ГАДААД ХАМТЫН АЖИЛЛАГАА
ШУА-ийн гадаад хамтын ажиллагаа бүс нутгийн түвшинд төдийгүй олон улсын хэмжээнд өргөжин хөгжсөөр байна. ШУА нь Олон улсын шинжлэх ухааны зөвлөлийн жинхэн гишүүн бөгөөд дэлхийн 10 гаруй олон улсын шинжлэх ухааны төрөлжсөн байгууллага, гадаадын 30 гаруй орны 100 гаруй эрдэм шинжилгээний байгууллага, их, дээд сургуультай нийт 180 гаруй гэрээ, хэлэлцээр, санамж бичиг, хөтөлбөр, бусад төрлийн баримт бичгийн хүрээнд хамтран ажиллаж байна.
2010 оноос Шинжлэх ухааны Академи нь Азийн шинжлэх ухааны зөвлөлийг тэргүүлэх болж, Азийн Шинжлэх ухааны Академиудын холбооны удирдах зөвлөлд сонгогдон ажиллах боллоо. Эрдэм шинжилгээ судлагааны ажлын чанарыг дээшлүүлэх, тэргүүлэх чиглэл, цөм технологийн чиглэлээр хамтарсан судалгаа шинжилгээний ажил гүйцэтгэх, бүс нутгийн хэмжээнд эрдэм шинжилгээний байгууллагуудын хамтын ажиллагааг өргөжүүлэн хөгжүүлэх чиглэлээр олон улсын хурал, зөвлөгөөнийг тогтмол зохион байгуулж байна.
ШУА-нь олон шинэ зорилтуудыг дэвшүүлж байгаагийн дотор шинжлэх ухаан, технологийн гадаад харилцааны нээлтэй, олон хэлбэртэй цогц бодлогыг өргөжүүлж, илүү шинэлэг, үр өгөөжтэй үйл ажиллагааг явуулахыг зорьж байна. Гадаадын олон улс, шинжлэх ухааны байгууллагатай хамтарсан уламжлалт арга хэмжээнүүдээс гадна шинэлэг олон арга хэмжээг авч хэрэгжүүлэх эрэл хайгуул хийж байна.
ШУА нь уламжлалт харилцаа бүхий орнуудтай байгуулсан гэрээ хэлэлцээр, хамтын ажиллагааны протокол, төлөвлөгөөг хэрэгжүүлэх, шинээр зарим орны академи, эрдэм шинжилгээний байгууллагатай харилцаа холбоо тогтоох, олон улсын чанартай арга хэмжээнд оролцох, хамтарсан төсөл, хөтөлбөр хэрэгжүүлэх, хамтарсан экспедици ажиллуулах, эрдэмтэд солилцох зэрэг чиглэлээр идэвхитэй үйл ажиллагаа явуулж байна.
Сүүлийн жилүүдэд мэдлэгт суурилсан нийгмийг хөгжүүлэх, тогтвортой болоод ногоон хөгжлийн асуудал, бүс нутгуудын нийгэм, эдийн засгийн хамтын ажиллагааны түншлэлийн шинэ арга, хэлбэр, тухайлбал торгоны зам, эдийн засгийн коридорийн судлагааны асуудлууд нь манай хөрш орнуудын эрдэмтэн судлаачдын сонирхол, анхаарлыг ихээхэн татаж байна. Ялангуяа Монгол, Орос, Хятад улсын эдийн засгийн коридорыг эрчимтэй, харилцан үр ашигтай хөгжүүлэх чухал нөхцлийн нэгэн нь манай 3 хөрш орны шинжлэх ухаан, технологийн судлагааны байгууллага, эрдэмтэн судлаачдын нягт хамтын ажиллагаа, тэдний идэвх санаачлагатай бүтээлч оролцоо юм.
ШУА нь дэлхийн олон орны шинжлэх ухааны академи, олон улсын судлагааны төрөлжсөн, мэргэжлийн олон нийтийн байгууллага, нийгэмлэгүүдтэй хамтын ажиллагааны гэрээ, хэлэлцээр санамж бичгүүдийг байгуулан амжилттай хамтран ажиллаж, гадаад харилцааг хөгжүүлэх, харилцаа бүхий орнуудын шинжлэх ухааны академиудтай байгуулсан гэрээ хэлэлцээр, хамтын ажиллагааны протокол, төлөвлөгөөны заалтыг хэрэгжүүлэх, зарим орны шинжлэх ухааны байгууллагуудтай шинээр харилцаа холбоо тогтоох, эрдэм шинжилгээний хамтарсан төсөл хэрэгжүүлэх, экспедици, олон улсын хурал, семинар зохион байгуулах, эрдэмтэн, солилцоог өргөтгөх, харилцаа мэдээллийг хөгжүүлэх зэрэгт анхааран ажиллаж байна.
