Архивын ерөнхий газартай хамтран ажиллах санамж бичгийг шинэчлэв
Монгол Улсын Шинжлэх Ухааны Академи, Монгол Улсын Засгийн газрын хэрэгжүүлэгч агентлаг Архивын Ерөнхий Газрын удирдлагуудтай энэ сарын 25-ны өдөр ШУА-ийн төв байранд албан уулзалт зохион байгуулж, ШУА-ийн Ерөнхийлөгч, академич Д.Рэгдэл, Архивын Ерөнхий Газрын дарга С.Энхбаатар нар хамтран ажиллах санамж бичгийг шинэчлэн гарын үсэг зурлаа.
ШУА нь АЕГ-тай 2019 онд хамтран ажиллах санамж бичиг байгуулан хамтарсан судалгаа хийх, олон улс, бүс нутгийн болон дотоодын эрдэм шинжилгээний хурал зохион байгуулах, ШУА-ийн гишүүд, академичдын хувийн сан хөмрөгөөр Үндэсний төв архивын сан хөмрөгийг баяжуулах зэргээр хамтран ажиллаж ирсэн.
Санамж бичгийг шинэчилснээр, гадаад хамтын ажиллагааны хүрээнд архивын ажилтнуудыг мэргэжил дээшлүүлэх, давтан сургах, угийн бичгийн судалгааг Үндэсний төв архив, Үндэсний төв номын сантай хамтран гүйцэтгэх, хуучин баримтыг сэргээн засварлахад ашиглах цавууны технологи боловсруулах, байгууллагын дотоод дүрэм, журмын хүрээнд оюуны өмч болон бусад мэдээллийн санг харилцан солилцох зэргээр уламжлалт хамтын ажиллагаагаа өргөжүүлэхээр боллоо.
Бусад мэдээлэл
