Монгол Улсын Ерөнхийлөгч У.Хүрэлсүх эрдэмтдэд “Академич” хэргэм хүртээв

Нийтлэсэн Б Билгүүн
2023-01-24
230

ШУА-ийн гишүүн сонгох сонгууль хоёр жилд тутамд нэг удаа зохион байгуулагддаг бөгөөд 2022 онд дотоодын 9, гадаадын 2 эрдэмтэн нэр дэвшиж Б.Батхишиг, Ч.Ган-Өлзий, Ч.Чимэдрагчаа, Р.Энхбат, Д.Энхтуяа, Мацүда (Япон), Н.С. Касимов (ОХУ) нарын эрдэмтэд тус тус сонгогдсон юм. Шинжлэх ухааны академийн Их чуулганы 2022 оны 12 дугаар сарын 08-ны өдрийн 02 дугаар тогтоолыг үндэслэн Монгол Улсын Ерөнхийлөгч Ухнаагийн Хүрэлсүх зарлиг гаргаж, нэр бүхий эрдэмтдэд өнөөдөр “Академич” хэргэм хүртээв.

МОНГОЛ УЛСЫН ЕРӨНХИЙЛӨГЧИЙН ЗАРЛИГААР:

Бадамдоржийн Батхишиг /ШУА-ийн Философийн хүрээлэнгийн Бодлого судлал, улс төрийн эдийн засгийн ухааны салбарын эрхлэгч, Эдийн засгийн шинжлэх ухааны доктор, профессор/
Чимэдцэрэнгийн Ган-Өлзий /ШУА-ийн Философийн хүрээлэнгийн эрдэм шинжилгээний тэргүүлэх ажилтан, Филсофийн шинжлэх ухааны доктор, профессор/
Чимэдцэрэнгийн Чимэдрагчаа /Уламжлалт анагаах ухаан, технологийн хүрээлэнгийн захирал, Анагаахын шинжлэх ухааны доктор, профессор/
Рэнцэний Энхбат /ШУА-ийн Математик, тоон технологийн хүрээлэнгийн Математикийн салбарын эрхлэгч, МУИС-ийн зөвлөх профессор/
Доржийн Энхтуяа /ШУТИС-ийн Үйлдвэрлэл технологийн сургуулийн “Shima Seiki training center” сургалтын төвийн захирал, Техникийн шинжлэх ухааны доктор (Sc.D), профессор/ нар “Академич” хэргэм хүртлээ.

Монгол Улсын Ерөнхийлөгч Ухнаагийн Хүрэлсүх тухайн салбартаа онолын шинэ дүгнэлт, судалгаа хийж, практикт нэвтрүүлэх аргачлал боловсруулан, олон улсын нэр хүндтэй сэтгүүлд бүтээлээ нийтлүүлж, судлаачдадаа хүлээн зөвшөөрөгдсөн эрхмүүдэд баяр хүргэж, амжилт хүсэн ерөөв.