Миний бие 2026 оны 7 дугаар сарын 1–3-ны өдрүүдэд Хорват улсын нийслэл Загреб хотноо зохион байгуулагдсан Олон улсын Байгаль орчны зайнаас тандан судлал (ЗТС), Газарзүйн мэдээллийн систем (ГМС)-ийн эрдэм шинжилгээний хуралд оролцсон юм. Энэхүү хурал нь Хорват улсын Үндэсний болон Их сургуулийн номын сангийн хурлын танхимд болж, Европ, Хойд Америк болон бусад бүс нутгийн олон орны эрдэмтэн, судлаачдыг нэг дор цуглуулсан, шинжлэх ухааны өндөр түвшний арга хэмжээ байлаа.

Монгол Улсаа төлөөлөн оролцсон миний бие өөрийн судалгааны ажлын үр дүнгүүдийг танилцуулж, илтгэлээ амжилттай хэлэлцүүлэв. Илтгэлийн дараа олон орны судлаачид Монгол орны байгаль орчин, экосистем, уур амьсгалын өөрчлөлт, бэлчээрийн доройтол, цөлжилт, түүнчлэн ЗТС, ГМС-ийн хөгжлийн талаар ихээхэн сонирхон асууж байлаа. Монгол орны өргөн уудам газар нутаг, байгалийн өвөрмөц тогтоц, экологийн эмзэг байдал, түүнийг судлахад орчин үеийн сансрын технологийг хэрхэн ашиглаж байгаа талаар би дэлгэрэнгүй тайлбар өгсөн бөгөөд хурал найрсаг уур амьсгал дунд үр бүтээлтэй болж өндөрлөлөө.