Америкийн нэгдсэн улсын (АНУ)  Мичиганы их сургуулийн Азийн төвийн захирал профессор, доктор Жиагуо Чи, Азийн төвийн ахлах эрдэмтэн, гавьяат профессор Доктор Стив Пуэппке, Азийн төвийн дэд захирал, Иргэний болон байгаль орчны инженерийн профессор Яду Похрел,  Азийн төвийн Хүнс, малын эрүүл мэнд, аж ахуй, үйлдвэрлэлийн тэнхимийн туслах профессор, доктор Тинг-Ю Чен, нарын баг, төлөөлөгчдийг ШУА-ийн удирдлага, холбогдох мэргэжлийн судлаачдын баг 5 дугаар сарын 05-нд хүлээн авч уулзав.

Тус баг нь Ус-Хүнс-Эрчим хүчний нийлмэл тогтолцооны талаар сургалт, судалгааг хэрэгжүүлдэг бөгөөд дэлхийн 27 байгууллагыг нэгтгэсэн Азийн төв (Asia Hub)-ийг Мичиганы их сургууль дээр байгуулан зүүн өмнөд болон төв Азийн орнуудад үйл ажиллагаагаа түгээн дэлгэрүүлэн ажиллаж байна.

Бид тус багийн төлөөлөлтэй Ирээдүйн дэлхий (future Earth), Monsoon Asian Integrated Research for Sustainability (MAIRS-FE) зэрэг байгууллагуудын хамтын ажиллагаагаар дамжуулан хамтран ажилладаг бөгөөд цаашид үйл ажиллагааг илүү гүнзгийрүүлэн Ус-Хүнс-Эрчим хүчний нийлмэл тогтолцооны чиглэлээр Asia Hub-тай хамтран ажиллах боломжийн талаар ярилцав.

Хамтын ажиллагааг албан ёсоор эхлүүлэхэд бидний өөрсдийн хүсэл сонирхол, идэвх чармайлт, манлайлал чухал байна гэдгийг онцлоод залуу судлаачдын эрч хүч, хүсэл сонирхлыг дэмжиж салбар дундын болон салбар дамнасан судалгааны хамтарсан төсөл хөтөлбөр хэрэгжүүлэх, төслийн санхүүжилтийн боломжуудыг эрэлхийлэх, салбарын хүний нөөцийг бэхжүүлэх чиглэлээр олон талт хамтын ажиллагааг бий болгоход харилцан санаачилгатай ажиллах талаар хэлэлцэв.