Эдийн засаг, хөгжлийн яам, Боловсрол, шинжлэх ухааны яам Дархан-Уул аймгийн ЗДТГ болон бусад холбогдох байгууллагууд хамтран Шинэ сэргэлтийн бодлого-Тогтвортой хөгжлийн зорилго форумыг Дархан-Уул аймагт зохион байгууллаа.

Форумын үеэр Дархан-Уул аймаг Шинжлэх ухааны академтай хамтран ажиллах харилцан ойлголцлын санамж бичиг байгуулсан юм. Санамж бичгийг Дархан-Уул аймгийн Засаг даргын орлогч Б.Жавхлан, Шинжлэх ухааны академийн ерөнхийлөгч Д.Рэгдэл нар үзэглэлээ.

Санамж бичгийн хүрээнд талууд шинжлэх ухааны үндэслэлтэй эрдэм шинжилгээ, судалгаа, шинэ техник технологи, инноваци нэвтрүүлж түншлэлийг өргөжүүлэх, дэд бүтцийг сайжруулах замаар орон нутгийг хөгжүүлэх, сургалт судалгаа, нийгэмд чиглэсэн үйл ажиллагаа хэрэгжүүлэх, үндэсний өв соёл, уламжлалыг түгээн дэлгэрүүлэх, тогтвортой хөгжлийн зорилтуудыг хангах, орон нутгийг хөгжүүлэх кластерын санаачилга боловсруулах, залуучуудын бизнес эрхлэлт, жижиг дунд үйлдвэрлэл, гарааны бизнесийг шинжлэх ухаан технологи, инновацын дэвшилд тулгуурлан хөгжүүлэх, шинжлэх ухаан технологийг орон нутгийн тогтвортой хөгжлийн үндсэн хүчин зүйлсийн нэг болгон хөгжүүлэх чиглэлд хамтран ажиллахаар болж байна.