БНХАУ-ын Сургалт, судалгаа-шинжилгээний байгууллагуудад 2025 оны 4дүгээр сарын 21-29-ны өдрүүдэд албан томилолтоор ажиллалаа. Томилолтын үеэр Шүзоу дахь Уул уурхай, технологийн их сургууль, ШУА-ийн харьяа хими, химийн технологийн хүрээлэн (ХХТХ) хоорондын хамтарсан “Нүүрснээс германи ялган авах” төслийн нээлтэд оролцлоо. Түүнчлэн Тайюун хот дахь Хятадын ШУА-ийн харьяа Нүүрс химийн хүрээлэнд ажиллаж, “Монгол Улсын нүүрсний судалгааны өнөөгийн байдал” сэдэвт илтгэл хэлэлцүүлэн, нүүрсний  судалгааны чиглэлээр цаашид хамтын ажиллагааг гүнзгийрүүлэх талаар санал солилцож хамтын ажиллагааг эхлүүлэх, гэрээ хэлэлцээр байгуулах ажлыг тохиролцов.

   Мөн Бээжин дэх Хятадын Уул уурхай, технологийн их сургуульд ажиллаж, тус сургуулийн Ерөнхийлөгч проф. Лю Бо-той уулзан Монгол Улсын ШУА болон тус сургууль хооронд хамтын ажиллагааг эхлүүлэх, хамтарсан судалгаа хөгжүүлэлтийн ажлыг өргөжүүлэх чиглэлээр уулзалт хийж санал солилцлоо. Тус их сургуулийн судалгааны нэг томоохон чиглэл нь зэс, алт, нүүрсний боловсруулалт, ялангуяа баяжуулалтад шаардлагатай шинэ төрлийн флотреагент гарган авах судалгаа юм. Иймд хамтын ажиллагааны хүрээнд сайн чанарын, өндөр үр ашигтай флотреагент гарган авч, цаашид зэсийн баяжмалын томоохон үйлдвэрүүдэд нэвтрүүлэх бололцоо гарна гэж үзлээ.
   

   Томилолтын үеэр Олон улсын шинжлэх ухааны  байгууллагуудын холбоо (ANSO)-ны удирдлагууд, гүйцэтгэх болон орлогч дарга Ш. Зан, Ш. Ие  нартай уулзаж, ANSO-ийн үйл ажиллагаанд Монгол Улсын ШУ-ны байгууллагууд хэрхэн оролцох, тэдгээрийн боломжийг нэмэгдүүлэх, цаашдын хамтын ажиллагааг өргөжүүлэх чиглэлээр уулзаж, санал солилцлоо.