Эгийн голын голын усан цахилгаан станцын бүтээн байгуулалтай холбогдуулан байгуулагдсан хоёр орны мэргэжлийн багийн хамтарсан хурал москва хотод боллоо
Монгол Улсад ОХУ-ын Ерөнхийлөгч В.В.Путины 2024 оны 9-р сард хийсэн албан айлчлалын үеэр хоёр орны Байгаль орчны сайд нар “Байгал нуур болон Сэлэнгэ мөрнийг хамгаалах салбарт хамтран ажиллах” тухай санамж бичигт гарын үсэг зурж, тус санамж бичгийн хүрээнд Эгийн голын УЦС төслийн Байгал нуур, Сэлэнгэ мөрөнд үзүүлж болзошгүй нөлөөллийг үнэлэх Монгол-Оросын мэргэжлийн баг байгуулагдсан юм. Уг мэргэжлийн багийн анхдугаар хуралдаан 2025 оны 2-р сарын 10-ны өдөр Москва хотод ОХУ-ын ШУА-ийн төв байранд амжилттай болж өнгөрлөө.
Хурлын эхний хэсэгт “Эгийн голын голын усан цахилгаан станц” төсөлтэй холбоотой өнгөрсөн хугацаанд хийсэн байгаль орчны судалгаануудын үр дүнг ажлын хэсгийн гишүүд хэлэлцэж, тэдгээртэй холбогдох мэдээллүүдийг харилцан солилцож, илтгэлүүдийг хэлэлцэв. Мөн цаашид зайлшгүй хийх шаардлагатай байгаа байгаль орчин, нийгмийн нөлөөллийн судалгааны ажлуудын хүрээг тодорхойлж, хамтран гүйцэтгэж улмаар хоёр орны сайд нарын баталсан ажлын төлөвлөгөөний дагуу судалгааны үр дүнг 2026 оны эхний хагаст Монгол Улсын засгийн газарт өргөн мэдүүлэхээр тохирлоо. Хурлын төгсгөлд талууд Эгийн голын УЦС төслийн Сэлэнгэ мөрөн, Байгал нуурт үзүүлж болзошгүй нөлөөллийг үнэлэх хоёр орны эрдэмтэн судлаачдаас бүрдсэн мэргэжлийн баг бий болж, анх удаа уулзаж, асуудлууд дээр санал нэгдэж байгаа нь уг төслийг амжилттай хэрэгжүүлэх үндэс болохыг тэмдэглэж, зайлшгүй хийх шаардлагатай байгаа байгаль орчин, нийгмийн нөлөөллийн судалгааны ажлыг ойрын хугацаанд хийж дуусгахыг зорилго болгохоо мэдэгдлээ. Мөн төлөвлөгөөт ажлыг цаг хугацаанд нь гүйцэтгэхэд шаардагдах санхүүжилтийг нэн яаралтай шийдвэрлэхгүй бол төслийг бүтээн байгуулалтын ажил удааширч болохыг төр засгийн холбогдох байгууллага, удирдлагад уламжлах нь зүйтэй гэж тохиров.
Хуралдааны үеэр ОХУ-ын ШУА-ийны ерөнхийлөгч Г.Я.Красников, дэд ерөнхийлөгч В.Я.Панченко нар МУ-ын ШУА-ийн ерөнхийлөгч С.Дэмбэрэлийг хүлээн авч уулзаж, дэлхийн хосгүй гайхамшигт өвөөр бүртгэгдсэн Байгал нуур болон Сэлэнгэ мөрний тогтвортой менежментийн чиглэлээр хамтран ажиллах, төслийг эхлүүлэх тал дээр ОХУ-аас онцгой ач холбогдол өгч, анхаарч буйгаа илэрхийлсэн юм.
Эгийн голын усан цахилгаан станцын төслийн Сэлэнгэ мөрөн, Байгал нуурт үзүүлж болзошгүй нөлөөллийг үнэлэх Монгол-Оросын мэргэжлийн багийн анхдугаар хуралд дараах төлөөллүүд оролцов.
Үүнд:
Монголын талаас – Академич С.Дэмбэрэл ахлагчтай Байгаль орчин, уур амьсгалын өөрчлөлтийн яам, Эрчим хүчний яам, МУ-ын Шинжлэх ухааны академи, Эгийн голын усан цахилгаан станц ТӨХХК-ийн төлөөллөөс бүрдэх 11 гишүүн;
Оросын талаас – Академич М.В. Болгов ахлагчтай ОХУ-ын Байгалийн нөөц, экологийн яам, ОХУ-ын Гадаад хэргийн яам, ОХУ-ын Шинжлэх ухааны академийн төлөөллөөс бүрдэх 24 гишүүн багтсан болно.
Бусад мэдээлэл
