Шинжлэх ухааны салбарын нийт эрдэмтэн судлаач, ажилтан албан хаагч Та бүхэнд XVII жарны “Элдэв эрдэнэт” хэмээгч хөхөгчин модон могой жилийн Сар шинийн мэндийг Монгол Улсын Шинжлэх Ухааны Академийн нэрийн өмнөөс болон хувиасаа өргөн дэвшүүлье!

    Улиран одож буй модон луу жилийг манай шинжлэх ухааны салбар эрдэм бүтээлийн арвин их олз омогтой үдэж байна.

   Шинжлэх ухааны ажилтны 2-р их хурлыг амжилттай зохион байгуулах, Шинжлэх ухаан, технологийн тухай хуулийн шинэчилсэн найруулгыг УИХ-аар батлуулах, Шинжлэх Ухааны Академийн Их сургууль (UMAS)-ийг байгуулах зэрэг ажлыг амжилттай хэрэгжүүллээ.

   Модон луу жилд манай Шинжлэх Ухааны Академи бууриа сэлгэн Эдийн засаг, хөгжлийн яаманд харьяалагдах болж, ШУА-ийн удирдлага, Салбарын Бага чуулгануудын бүрэлдэхүүн шинэчлэгдэн, шинэ академичид төрөн гарч, шинэ эрч хүч, шинэлэг бодлогоор үйл ажиллагаагаа эрчимжүүлэхийг зорин ажиллаж байна.

   Монголын түүхэнд могой жил эрдэм номын хур буулгадаг уламжлалтай билээ. Түүний жишээ болгож 1269 оны шарагчин могой жил Пагва ламын зохиосон дөрвөлжин бичгийг төрийн бичиг болгон зарлаж, 1305 оны хөхөгчин могой жил алдарт гүүш Чойжи-Одсэр “Бодичаръяавадра” хэмээх зохиолыг орчуулж, 1629 оны шарагчин могой жил их хөлгөн судар “Ганжуур”-ыг монголоор орчуулж дуусган, 1677 оны улагчин могой жил “Асрагч нэртийн түүх” хэмээх Монголын түүхийн тулгуур сурвалжийг зохиож, 1749 оны шарагчин могой жил “Данжуур”-ын монгол орчуулгыг хэвлэсэн тэргүүтнийг дурдаж болно.

   Айлчлан ирж буй модон могой жилд ч Монгол Улсын шинжлэх ухааны салбар хөгжлийн шинэ шатанд гарч, Шинжлэх Ухааны Академи маань Та бүхний оролцоо, дэмжлэгтэйгээр өмнөө тавьсан зорилгодоо хүрч, эрдэм судлалын үйлс маань өрнүүн дэлгэр байна гэдэгт итгэлтэй байна.

  Та бүхэнд “Элдэв эрдэнэт” хэмээгч хөхөгчин модон могой жилийн мэндийг дахин дэвшүүлж, юу санасан есөн цагаан хүсэл тэнь сэтгэлчлэн бүтэхийн ерөөлийг айлтгая!

Сар шинэдээ сайхан шинэлээрэй!


                                               Монгол Улсын Шинжлэх Ухааны Академийн Ерөнхийлөгч, академич С.Дэмбэрэл