Монгол Улсын Шинжлэх ухааны академийн ерөнхийлөгч, Академич Содномсамбуугийн Дэмбэрэл болон Ази Номхон Далайн Сансрын Хамтын Ажиллагааны Байгууллагын (APSCO) ерөнхий нарийн бичгийн дарга Доктор Жианг Хуй нар 2025 оны 8 дугаар сарын 29-ны өдөр хоёр байгууллагын хооронд хамтран ажиллах санамж бичигт гарын үсэг зурлаа.

Тус байгууллага 8 гишүүн улсаас бүрдэх бөгөөд гишүүн улсуудын оролцоо, хамтын ажиллагаа, хүртэх үр шимийг тэнцүү хөгжүүлж ирсэн. Энэ удаад тус байгууллагын шинэ удирдлагын баг манай улсын сансрын салбарын бодлого, стратеги, хүсэл сонирхол, дэмжлэг туслалцаа, хэтийн зорилго, хамтын ажиллагааны чиглэлийг ойлгон уламжлалт болон шинэ хамтын ажиллагааг хөгжүүлэх зорилгоор айлчлал хийж байгаа нь чухал үүрэгтэй юм.

Манай байгууллага гишүүн орны хувьд APSCO-оос зохион байгуулдаг төсөл, хөтөлбөр арга хэмжээнд байнга идэвхтэй оролцож хамтран ажилладаг ба цаашид сансар судлалын салбарт бүс нутгийн хэмжээнд хамтран ажиллах зорилгоор албан ёсоор хамтын ажиллагааг эхлүүлэв.