ШУА-ийн Ерөнхийлөгч, академич С.Дэмбэрэл чуулганыг нээж хэлсэн үгэндээ:, “Өнгөрч буй 2025 он эрдэмтэн судлаачид 1200 гаруй өгүүллийг олон улсад бүртгэлтэй мэргэжлийн эрдэм шинжилгээний сэтгүүлүүдэд нийтлүүлж, Дэлхийн шинжлэх ухаанд шинэ нээлт, шинэ мэдлэг бүтээж, техник технологи, инновацын чухал дорвитой шийдлүүд гарган, төр засаг, хувийн хэвшлийн байгууллагуудтай бүтээлчээр хамтран ажилласан амжилт бүтээлтэй жил байсан гээд Монгол эрдэмтдийн SCOPUS-т бүртгэлтэй сэтгүүлүүдэд хэвлүүлсэн бүтээлийн тоо өмнөх оныхоос 3.5 дахин өсөж, хэвлүүлж буй бүтээлийнхээ тоогоор Монгол Улс Азидаа 19 дүгээр байранд байгааг онцлон дурдлаа.

ШУА-ийн эрдэмтэн нарийн бичгийн дарга, доктор (ScD) Ш.Ариунаа чуулганы дэгийн дагуу “Монгол Улсын Шинжлэх ухаан, технологийн салбарын 2025 оны нэгдсэн тайлан”-г танилцуулж хэлэлцүүлэв.

Монгол Улсын шинжлэх ухаан, технологийн салбарын 46 байгууллагын амжилт бүтээлийг нэгтгэсэн тайланг ШУА-ийн жинхэнэ гишүүн Академчид сайшаан хүлээн авлаа.

Чуулганы үеэр ШУА-ийн ерөнхийлөгч С.Дэмбэрэл 2025 онд амжилт бүтээлээ төрдөө үнэлүүлж Чингис хааны тэргүүн зэргийн одон хүртсэн академич С.Нарангэрэл, Хөдөлмөрийн баатар цол хүртсэн Академич А.Дулмаа, Шинжлэх ухааны гавьяат зүтгэлтэн цол хүртсэн Академич Д.Амарсайхан, Академич Х.Энхжаргал нарт хүндэтгэл үзүүлэв.