Нэг бүс ба Нэг замын хүрээн дэх Олон улсын болон үндэсний шинжлэх ухааны байгууллагуудын холбоо (ANSO)-ны 3 дахь удаагийн Их Чуулган 2025 оны 10 дугаар сарын 27-31-нд БНХАУ-ын Бээжин хотод болж өнгөрлөө.

Энэхүү Их Чуулганаар  тус байгууллагын удирдах зөвлөлийг шинэчлэн байгуулсан бөгөөд Монгол Улсын ШУА, ШУА-ийн Тэргүүн дэд ерөнхийлөгч, академич Б.Авид дахин сонгогдож 2025-2027 онуудад үргэлжлүүлэн ажиллахаар боллоо.  Энэ удаагийн удирдах зөвлөлд 8 орны гишүүн байгууллагын (Монгол улсын ШУА-иас гадна Хятадын ШУА, Чили Улсын их сургууль, Сенегалын Үндэсний ШУА, Сербийн ШУ ба урлагийн академи, Өмнөдийн Улсуудын Тогтвортой хөгжлийн төлөөх ШУ технологийн комисс, Египетийн Үндэсний судалгааны төв, Узбекийн ШУА) төлөөллүүд сонгогдож ажиллахаар боллоо.

Энэ жилийн Их Чуулганыг “Тогтвортой Хөгжилд Шинжлэх  Ухаан ба Инновац” уриан дор олон улсын томоохон хурал, хэлэлцүүлгийг зэрэгцүүлэн зохион байгуулав. ШУА-ийн Тэргүүн дэд ерөнхийлөгч, академич Б.Авид “Хүртээмжтэй хөгжилд нээлттэй шинжлэх ухаан ба инновац” сэдэвт нэгдсэн хуралдаанд панелистаар, бусад салбар хуралдаануудад ШУА-ийн Ботаникийн цэцэрлэгт хүрээлэнгийн захирал биологийн шинжлэх ухааны доктор И.Түвшинтогтох, ШУА-ийн Физик, технологийн хүрээлэнгийн ЭШТА, академич Д.Сангаа  нар оролцлоо.

АНСО нь Монгол улсын шинжлэх ухаан, технологийн салбарыг хөгжүүлэхэд томоохон байр суурьтай оролцдог бөгөөд сүүлийн жилүүдэд олон судлаачид магистр болон докторын тэтгэлэгтэй сургалтад хамрагдахаас гадна тус байгууллагын санхүүжилтээр томоохон төслүүд ШУА-ийн хүрээлэнгүүдэд хэрэгжиж байна.