Дэлхийн шинжлэх ухааны ажилтны өдөрт зориулан Унгар улсаас Монгол Улсад суугаа Элчин сайдын яамнаас санаачлан, Монгол Улсын Шинжлэх Ухааны Академитай хамтран “Монгол-Унгарын эрдэм шинжилгээний хурал”-ыг 2024 оны 11 дүгээр сарын 21-ний өдөр зохион байгууллаа.
Энэхүү хурлын нээлтэд Унгар улсаас Монгол Улсад суугаа Элчин сайд, доктор Обрущанский Борбала болон ШУА-ийг төлөөлж дэд ерөнхийлөгч, доктор (ScD) Ц.Цэрэндорж үг хэлж, ШУА-ийн ерөнхийлөгчийн мэндчилгээг уламжиллаа.
Тус хурлаар хоёр улсын Шинжлэх Ухааны Академи хооронд хамтран хэрэгжүүлж байгаа мобилити болон бусад төсөл, судалгааны үр дүнгүүдийн талаарх Унгарын талаас 7, Монголын талаас 6, нийт 13 илтгэл хэлэлцүүллээ. Хурлын зорилго нь хоёр улсын эрдэмтэн судлаачдын хамтын ажиллагааг өргөжүүлэх, шинжлэх ухааны тодорхой чиглэлээр хамтарсан судалгаа явуулах, харилцан мэдлэг мэдээлэл солилцох замаар найз нөхөрлөлийн хүрээг тэлэх, хүний нөөцийг чадавхжуулах, судалгаа хөгжүүлэлтийн ажлын явц, үр дүнг олон нийтэд сурталчлах, түгээн дэлгэрүүлэх, судлаачдын хамтын ажиллагааг өргөжүүлэх юм.
