Монгол Улсын Шинжлэх Ухааны Академийн ерөнхийлөгч, академич С. Дэмбэрэл, БНХАУ-ын Шинжлэх Ухааны Академийн дэд ерөнхийлөгч, академич Хэ Хонгфин нар 2025 оны 10 дугаар сарын 31-ний өдөр хоёр байгууллагын хооронд хамтран ажиллах санамж бичгийг шинэчлэн байгууллаа. Энэ удаад Монгол улсын ШУА-ийн төлөөлөгчид  Олон улсын болон үндэсний шинжлэх ухааны байгууллагуудын холбоо (ANSO)-ны 3-р Их Чуулганд оролцох үеэрээ хятадын шинжлэх ухааны академи (CAS)-ийн төлөөлөгчидтэй албан уулзалт зохион байгуулж, хамтын ажиллагааг албажуулан, цаашдын хамтын ажиллагааны чиглэлийг ярилцаж тохиролцлоо.

Тус хэлэлцээрийн хүрээнд цаашид хамтарсан судалгааны төсөл хөтөлбөр хэрэгжүүлэх, хамтарсан судалгааны станц, төв, лаборатори байгуулах, орчин үеийн багаж төхөөрөмжөөр шинэчлэх, салбарын хүний нөөцийг ахисан түвшинд бэлтгэх  зэрэг чиглэлээр илүү идэвх, санаачилгатай ажиллахаар тохиролцлоо.

Хамтарсан судалгааны сэдэв чиглэлийн тухайд Биотехнологи, Тархи, сэтгэл судлал, Нүүрс болон минералын технологийн судалгаа, цөлжилт газрын доройтол, геологи, тектоник, материал судал, хотын экологи, зайнаас тандан судлал болон бусад шинжлэх ухааны салбар чиглэлээр хамтарсан судалгааг илүү хөгжүүлэн ажиллах юм.

Хятадын шинжлэх ухааны академи бол Монгол улсын шинжлэх ухаан, технологийн салбарыг хөгжүүлэхэд томоохон байр суурьтай оролцдог бөгөөд сүүлийн жилүүдэд олон судлаачид магистр болон докторын тэтгэлэгтэй сургалтад хамрагдахаас гадна олон хүрээлэнгүүд хамтран томоохон төслүүд хэрэгжүүлж, хамтарсан лаборатори байгуулж байгаа билээ.