Монгол Улсын Шинжлэх Ухааны Академи болон Бүгд Найрамдах Узбекистан Улсын Шинжлэх Ухааны Академийн хооронд шинжлэх ухааны салбарт хамтран ажиллах тухай хэлэлцээр байгуулав.

• 

  Нийтлэсэн Б Билгүүн
• 2024-06-25
• 473

Монгол Улсын Ерөнхийлөгч У.Хүрэлсүхийн Бүгд Найрамдах Узбекистан Улсад хийж буй төрийн айлчлал үргэлжилж байна.
Тус айлчлалын хүрээнд Монгол Улсын Шинжлэх Ухааны Академи (ШУА) болон Бүгд Найрамдах Узбекистан Улсын Шинжлэх Ухааны Академи (БНУУШУА)-ийн хооронд шинжлэх ухааны салбарт хамтран ажиллах тухай хэлэлцээрт  2024 оны 06 дугаар сарын 24-ний өдөр гарын үсэг зурлаа. Тус Хэлэлцээрийн хүрээнд талууд шинжлэх ухаан, технологийн салбарт суурь, хавсарга судалгаа, инновацын хөгжлийг дэмжиж ажиллана. Энэ хүрээнд хамтын ажиллагааны дараах чиглэлүүдийг тэргүүлэх чиглэл гэж талууд хүлээн зөвшөөрсөн.  Үүнд:

Хүмүүнлэгийн  болон байгалийн шинжлэх ухааны салбарын суурь ба гүнзгийрүүлсэн судалгаа 

•  Судалгааны үр дүн, шинэлэг технологийг практикт нэвтрүүлж, улмаар хоёр орны нийгэм эдийн засаг, шинжлэх ухаан-техникийн чадавхыг дээшлүүлэхэд хувь нэмэр оруулах судалгааг хэрэгжүүлэх.
•  Үндэсний соёл, боловсрол, соён гэгээрүүлэх үйл ажиллагаатай холбоотой асуудал, үйл явцыг шийдвэрлэхэд чиглэсэн Байгаль, нийгэм, хүний бүтээлийн хөгжлийн санал боловсруулах.
•  Цаашдын судалгаанд зориулсан шинжлэх ухаан, техникийн хөтөлбөр боловсруулах зэрэг болно 

Хэлэлцээрийг хэрэгжүүлэхдээ хамтын ажиллагааны дараах хэлбэрийг ашиглана. Үүнд:

•  Эрдэмтэн, мэргэжилтэн солилцох
•  Энэхүү хэлэлцээрийн заалтын дагуу эрдэм шинжилгээний байгууллагуудын шууд хамтран ажиллах 
•  Хамтарсан судалгааны төсөл хэрэгжүүлэх 
•  Олон улсын эрдэм шинжилгээний форумд эрдэмтэн, судлаачдыг оролцуулах 
•  Шинжлэх ухааны мэдээлэл, ном зохиол солилцох 
•  Талуудын тохиролцсон хамтын ажиллагааны бусад хэлбэр гэх мэт болно. 

 

 

---

Бусад мэдээлэл