БНАСАУ-аас Монгол Улсад суугаа Онц бөгөөд Бүрэн эрхт элчин сайд О Сын Хо ШУА-ийн Дэд ерөнхийлөгч, доктор (Sc.D) Ц.Цэрэндорж нарын албаны хүмүүсийг 2024 оны 1 дүгээр сарын 16-ны өдөр хүлээн авч уулзлаа. Уулзалтаар хоёр улсын ШУА хооронд байгуулсан хамтран ажиллах санамж бичгийн хүрээнд хийж гүйцэтгэсэн ажлын үр дүнг хангалттай хэмээн дүгнэж, цаашид сунгах боломжийн талаар хэлэлцэв. БНАСАУ дахь Монголын эзэнт гүрний үеийн түүхэнд холбогдох дурсгалт газрууд, соёлын өвийг судлах, сурталчлах талаар санал солилцов.

Элчин сайд О Сын Хо БНАСАУ, Солонгосын хойгийн сүүлийн үеийн нөхцөл байдал, улс ардын аж ахуйн ололт амжилтын талаар товч танилцуулав. Тэрээр хоёр орны шинжлэх ухааны байгууллагууд хоорондын хамтын ажиллагааны үр дүнд сэтгэл хангалуун байдгаа тэмдэглээд, албан ажлын хүсэлтийн дагуу холбогдох байгууллагуудтай хамтран ажиллахад бүх талаар дэмжин ажиллахаа илэрхийлэв.

Дэд ерөнхийлөгч Ц.Цэрэндорж цаг гарган хүлээн авч уулзан, мэдээлэл солилцсонд талархал илэрхийлээд Монгол, Солонгосын эртний түүхэн харилцааны талаар туурвисан сүүлийн үеийн судалгааны бүтээлүүдээс ЭСЯ-ны номын санд өргөн барилаа. Цар тахлын улмаас тасраад байгаа хоёр талын шинжлэх ухаан, эрдэм шинжилгээний хамтын ажиллагаа ойрын хугацаанд эргэн сэргэж улам идэвхтэйгээр хамтран ажиллана гэдэгт итгэлтэй байгаагаа хоёр тал илэрхийлэв. Уулзалтад ЭСЯ-ны нэгдүгээр нарийн бичгийн дарга Хан Чол Мин, ШУА-ийн Олон улс судлалын хүрээлэнгийн захирал, доктор Д.Золбоо нар байлцав.