Хурлыг нээж ШУА-ийн эрдэмтэн нарийн бичгийн дарга, академич Б.Авид, ШУА-ийн Физик, математик, информатикийн салбарын Бага чуулганы дарга, академич Д. Сангаа нар үг хэлэв.

Мөн ШУА-ийн Геологи, газарзүй, байгаль орчны Бага чуулганы дарга, академич Д.Доржготов, ШУА-ийн Геологийн хүрээлэнгийн захирал, доктор(Ph.D) Д.Одгэрэл, ШУА-ийн Физик, математик, информатикийн салбарын Бага чуулганы эрдэмтэн нарийн бичгийн дарга, доктор(Ph.D) Ц.Болортамир нар хурлыг чиглүүлэн удирдаж явууллаа.

Тус хуралд Засгийн газрын хэрэгжүүлэгч агентлаг Ашигт малтмал, газрын тосны газар, ШУА-ийн Хими, химийн технологийн хүрээлэн, ШУТИС-ийн Хэрэглээний Шинжлэх ухааны сургууль, МУИС-ийн Шинжлэх ухааны сургууль, Монголын газрын тос боловсруулах үйлдвэр ТӨХХК, Жэйд Газ Монгол ХХК зэрэг төр, эрдэм шинжилгээний байгууллага, их дээд сургуулиуд болон хувийн хэвшлийн байгууллагын төлөөллөөс 8 үндсэн илтгэлийг хэлэлцүүлэв.

Хурлын нэгдсэн хэлэлцүүлгээс тус салбарын хууль эрхзүйн орчныг боловсронгуй болгох, стандарт, дүрэм журмыг салбарт нь тохируулан шинэчлэх, олон нийтэд салбарын онцлогийг зөвөөр ойлгуулах, соён гэгээрүүлэх ажлыг шат шатанд нь зохион байгуулах, газрын тосны болон метан хийн суурь судалгааг эрчимжүүлэх, хүний нөөцийг бэлтгэх, салбар хоорондын хамтын ажиллагааг хөгжүүлэх зэрэг олон асуудлыг хөндсөн саналууд гарсан бөгөөд хурлаас зөвлөмж гаргаж холбогдох байгууллагуудад хүргүүлэхээр тогтлоо. Хуралд тус салбарын хамааралтай 50 орчим хүн хамрагдлаа.