БНХАУ-ын Хармөрөн мужийн Нийгмийн шинжлэх ухааны академи “Зүүн хойд Азийн форум II” олон улсын эрдэм шинжилгээний хурлыг 3 дугаар сарын 5-ны өдөр Харбин хотноо зохион байгууллаа. Тус хуралд ШУА-ийн Олон улсын харилцааны хүрээлэнгийн захирал доктор /Sc.D/, профессор Ж.Баясах, тус хүрээлэнгийн ЭШТА доктор /Ph.D/ Н.Төмөр, эрдэм шинжилгээний ажилтан М.Хишигтуяа нар урилгаар оролцож, илтгэл хэлэлцүүлжээ.
Форумын үеэр “Шилдэг илтгэл”-үүдийг тодруулсан бөгөөд үүнд доктор /Sc.D/, профессор Ж.Баясахын “Зүүн хойд Азийн аюулгүй байдлын стратегийн тулгамдсан асуудлууд”, доктор /Ph.D/ Н.Төмөрийн “Монгол-Хятадын эдийн засгийн харилцаа ба Монгол, Хятад, Оросын эдийн засгийн коридор байгуулах асуудалд” илтгэлүүд тус тус шалгарч өргөмжлөл хүртэв.
Тус форумд монгол улсын судлаачдаас гадна Япон, ОХУ, БНХАУ-ын судлаачид илтгэл хэлэлцүүлсэн байна. Хурлын үеэр ШУА-ийн Олон улсын харилцааны хүрээлэн Хармөрөн мужийн Нийгмийн ухааны академийн Зүүн хойд Ази судлалын хүрээлэнтэй “Хамтран ажиллах гэрээ”-г байгуулав. Мөн энэ үеэр Хармөрөн мужийн Нийгмийн ухааны академийн Зүүн хойд Ази судлалын хүрээлэн ШУА-ийн Олон улсын харилцааны хүрээлэнгийн захирал Ж.Баясахын олон улсын харилцааны чиглэлээр ажилласан олон жилийн хөдөлмөр, зүтгэлийг өндрөөр үнэлж өөрийн хүрээлэнгийн “Хүндэт академич”-иар өргөмжилжээ.
