Өнөөдөр Монгол-Германы шинжлэх ухааны салбарын хамтын ажиллагааны хүрээнд Монгол Улсын Шинжлэх ухааны Академи, ХБНГУ-ын Бонны Их Сургууль хоорондын Монгол-Германы Хархорин Экспедицийн хамтын ажиллагааг 2019 хүртэл үргэлжлүүлэхээр тохиролцлоо. Хамтын ажиллагааны гэрээг Монгол улсын Шинжлэх ухааны Академийн Тэргүүн дэд Ерөнхийлөгч, академич Д.Рэгдэл болон Бонны их сургуулийн хүрээлэнгийн захирал профессор Ян Бемманн нар үзэглэсэн юм.
Монгол Улсын Ерөнхийлөгч, ХБНГУ-ын Холбооны Ерөнхийлөгч нарын ивээл дор Монгол Улсын Шинжлэх ухааны Академийн Археологийн хүрээлэн, Бонны Их Сургуулийн Өвөг ба Эртний түүхийн Археологийн Хүрээлэн хамтран ажилласнаас хойш 15 жил өнгөрчээ. Энэ хугацаанд хоёр тал хамтран Монголын Эртний нийслэл Хархорин хот, хот орчмыг судлах эрдэм шинжилгээний ажлыг амжилттай хэрэгжүүлсэн юм. Түүнчлэн Бонны Их Сургууль манай судлаачдыг дэмжих зорилгоор ХБНГУ-д эрдмийн зэрэг хамгаалах боломж олгож, монголын олон залуу археологичид тус улсад мэргэшил дээшлүүлж байна.
