2026 оны анхны “ЭЛЧИН САЙДЫН ИНДЭР” хүндэтгэлийн цуврал лекцийн зочноор Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд Ноён Алмас Сейтакынов оролцож “Монгол-Казахстаны харилцааны товч тойм, хөгжлийн хэтийн төлөв” сэдвээр илтгэл хэлэлцүүллээ. Тэрээр лекцээ Казахстан улсын гадаад бодлого, стратегийн түншлэл, гадаадын хөрөнгө оруулалт, худалдаа, эдийн засаг, боловсруулах үйлдвэр, тээвэр ложистик, хөдөө аж ахуй, эрчим хүч, дэвшилтэт технологи, түүний хөгжлийн Казакстан улсад үзүүлж байгаа үр нөлөөллийг онцлон танилцуулж эхлүүлэв. Мөн тэрээр Монгол Казахстан хоёр улсын стратегийн түншлэл, хамтарсан шинжлэх ухаан, технологийн салбарын судалгааны чиглэлийг экологи, цөлжилт, уур амьсгалын өөрчлөлтийн нөлөөлөл, Геологи, зайнаас тандан судлал, их өгөгдөл, соёлын салбарт түлхүү хөгжүүлэх боломжийн талаар танилцууллаа. Ингээд хамтын ажиллагааны түншлэлийг бэхжүүлэхэд боловсрол, спорт, академик судлаачдын солилцоог өргөн хүрээнд хоёр орны мэргэжлийн байгууллагуудын дунд эрчимтэй өрнүүлэхэд дэмжлэг үзүүлэн ажиллах боломжтойг онцолж хэлэлцүүлгээ өндөрлөв.