Монгол Улсын Шинжлэх Ухааны Академиас 2015 оноос шинжлэх ухааны танин мэдэхүйн хялбаршуулсан цуврал номыг эрхлэн гаргаж, олны хүртээл болгож байна. 2022 онд 14 цуврал /82-95 дахь дугаар/ бичиж, хэвлүүлээд байна.
Энэхүү цуврал бүтээл нь шинжлэх ухааны олон салбар, чиглэлийн мэдлэгийг энгийн ойлгомжтой хэлбэрээр хялбаршуулан бичсэнээрээ онцлог бөгөөд хүүхэд, багачуудад шинжлэх ухааны мэдлэг олгох, цаашлаад шинжлэх ухаанч иргэн болгон төлөвшүүлэхэд ихээхэн ач холбогдолтой юм.
Хялбаршуулсан цуврал бүтээлийн 2022 оны 92 дахь дугаарт доктор Б.Хулан, Б.Ганцэцэг нарын бичсэн “Нефть шингэн алт” бүтээлийг хэвлэн нийтлүүлэв.
Тус бүтээлд дэлхийн эдийн засгийн өртгийг тодорхойлогч “шингэн хар алт” хэмээн нэрлэгдэх нефть гэж чухам юу болох, найрлага шинж чанар, улмаар тэдгээрийн боловсруулалтын дүнд түлш шатахуун, химийн үйлдвэрлэлийн бүтээгдэхүүнийг хэрхэн гарган авах тухай мэдээллийг шинжлэх ухааны үндэслэлтэй бичжээ.
Манай орны хувьд анх 1931 онд Америкийн геологич Д.Теннер Монгол оронд нефть байж болох таамаглал дэвшүүлж, 1940-өөд оноос эхлэн Орос, Монголын хамтарсан геологийн судалгааны ажил явагдаж, үр дүнд нь манай орны зүүн болон зүүн өмнөд хэсэгт нефтийн хуримтлал байгааг илрүүлжээ. Улмаар нефтийн өрөмдлөг, олборлолтын ажлыг өрнүүлж, Зүүнбаянд нефть боловсруулах бага оврын үйлдвэрийг байгуулан нефтиэ боловсруулан тухайн үеийн нийт хэрэгцээний 20-30 хувийг хангаж байсан түүхийг эндээс үргэлжлүүлэн унших боломжтой.
