Энэ үеэр БШУЯ-ны Шинжлэх ухаан, технологи, инновацын бодлого, хэрэгжилтийг зохицуулах газрын шинжээч Б.Урьболд “Монгол Улсын Засгийн газраас нээлттэй шинжлэх ухааныг хөгжүүлэх чиглэлд авч буй арга хэмжээ, бодлого” сэдвээр, ЮНЕСКО-ийн Байгалийн шинжлэх ухааны салбарын Шинжлэх ухааны бодлого, суурь шинжлэх ухааны хэлтсийн захирлын үүргийг түр орлон гүйцэтгэгч ноён Эзра Кларк “Нээлттэй шинжлэх ухааны талаарх ЮНЕСКО-ийн зөвлөмжийн танилцуулга” сэдвээр тус тус илтгэл тавив.

Улмаар ЮНЕСКО-ийн Монголын үндэсний комисс нь БШУЯ, ШУА, Шинжлэх ухаан, технологийн сан, Шинжлэх ухаан, технологийн үндэсний зөвлөл, ШУТИС зэрэг Монгол улсын шинжлэх ухаан, технологи, инновацын салбарын холбогдох байгууллагуудын төлөөлөгчдөд “Нээлттэй шинжлэх ухааны талаарх ЮНЕСКО-ийн зөвлөмж” номын монгол хэлнээ орчуулсан хувилбарыг гардууллаа.

2019 оны 11-р сард болсон ЮНЕСКО-ийн Ерөнхий бага хурлын 40-р чуулганаар Нээлттэй шинжлэх ухааны талаарх зөвлөмжийн төслийг боловсруулах шийдвэрийг гаргаж, улмаар ЮНЕСКО нь энэхүү шийдвэрийн дагуу бүс нутгийн тэнцвэрт байдал, олон талт оролцоог хангах замаар тус зөвлөмжийг боловсруулан 2021 оны 11-р сард болсон ЮНЕСКО-ийн Ерөнхий бага хурлын 41-р чуулганаар батлуулсан. Энэхүү зөвлөмж нь шинжлэх ухааны мэдлэгийг хүн бүр олон хэл дээр, нээлттэй, хүртээмжтэй, дахин ашиглах боломжтой болгох, шинжлэх ухааны хамтын ажиллагаа, мэдээллийн солилцоог шинжлэх ухаан, нийгмийн ашиг тусын тулд нэмэгдүүлэх, мөн түүнчлэн шинжлэх ухааны мэдлэгийг бий болгох, үнэлэх, мэдээлэл солилцох үйл явцыг уламжлалт шинжлэх ухааны нийгэмлэгээс бусад нийгмийн оролцогч талуудад нээлттэй болгох зорилготой юм.