Монгол Улсын Шинжлэх Ухааны Академийн Ерөнхийлөгч, академич С.Дэмбэрэл 2026 оны 1 дүгээр сарын 20-ны өдөр Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд ноён Алмас Сейтакыновыг ШУА-ийн Тэргүүлэгчдийн газарт хүлээн авч уулзлаа.

Уулзалтын эхэнд академич С.Дэмбэрэл Элчин сайдыг Монгол Улсын Шинжлэх Ухааны Академид зочилж буйд чин сэтгэлээсээ талархал илэрхийлж, цаашид хамтын ажиллагааг өргөжүүлэн хөгжүүлэхэд нээлттэй байгаагаа онцлов. Харин Элчин сайд ноён Алмас Сейтакынов цаг гарган хүлээн авч уулзсанд талархал илэрхийлээд, хоёр улс уламжлалт найрсаг харилцаатай бөгөөд шинжлэх ухааны салбарт хамтран ажиллах өргөн боломж бий гэдгийг тэмдэглэн, Элчин сайдын яамны зүгээс уг хамтын ажиллагааг бүх талаар дэмжин ажиллахаа мэдэгдлээ.

Уулзалтын үеэр хоёр орны шинжлэх ухааны академийн хооронд байгуулсан хамтын ажиллагааны хэлэлцээрийн хугацаа дууссантай холбогдуулан түүнийг сунган шинэчлэн баталгаажуулах, түүх, археологи, уур амьсгалын өөрчлөлтийн чиглэлээр хамтарсан судалгаа хэрэгжүүлэх, эрдэмтэн судлаачдыг харилцан солилцох, эрдэм шинжилгээний байгууллагуудын хамтын ажиллагааг дэмжих зэрэг асуудлаар санал бодлоо дэлгэрэнгүй солилцлоо.